ЫСТАПААНАП уутугар-хаарыгар киирдэ

«Сатабыл» балаһаҕа быйыл Урбаанньыт сыла биллэриллибитинэн сибээстээн, дьоҕус бизнес эйгэтигэр саҥа үктэммит Александр Степановы билиһиннэрэн туран, дьоҕус бизнеһи тэриниэн баҕалаах дьоҥҥо сүбэ быһыытынан бу матырыйаалы бэлэмнээтим.

Александр СТЕПАНОВ,
Кэбээйи улууһун Сэбээн Күөлүн олохтооҕо:

—  Мин быйыл урбаанньытынан саҥа регистрацияланным. Бу иннинэ оскуолаҕа учууталлыы сылдьыбытым. Оргтиэхиникэҕэ сыһыаннаах буолан, бу эйгэҕэ бэйэ дьыалатын арынан үлэлээн эрэбин. Саҥа саҕалааһын буолан, уубар-хаарбар дьэ киирэн эрэбин. Бастакы саҕалааһыҥҥа биэрбит харчыларыгар куоракка кэлэн үлэбэр наадалаах араас тэрил атыыластым. Төрөөбүт нэһилиэгим туһунан кэпсиир сайт оҥортордум. Бу дьоҕус бизнеһим эмиэ биир көрүҥүнэн буолуоҕа. Сэбээн Күөл  —  наһаа кыраһыабай айылҕалаах, бултаах-алтаах, бэйэтэ баай историялаах, былыр-былыргыттан эбээн норуота түөлбэлээн олорор сирэ. Онон Интернет ситимин нөҥүө бэйэм дойдубун анаан пропагандалыам.
Дьоҕус бизнес тэринэр туһунан уруккуттан толкуйданарым да, кыайыам суоҕа дии санаан, ылсыбат этим. Биир үтүө күн улуус баһылыгын солбуйааччы Александр Андреев: «Бэйэ дьыалатын аһан үлэлээ, биһиги өйүөхпүт», —  диэн сүбэлээбитэ. Онуоха мин толкуйданан көрбүтүм: «Кырдьык да, хаһааҥҥа диэри ким эрэ сорудаҕын толоро, чаастаах үлэни маныы сылдьыахпыный? Аны биэнсийэҕэ тахсан баран олоруом дуо, онон инникибин эрдэттэн бэйэм оҥоһуннахпына сатанар», —  дии санаан, бэйэм дууһам сытар эйгэтигэр дьоҕус бизнес тэринэн үлэбин саҕалаатым. Онон Александр Васильевичка сөптөөх сүбэтин иһин истиҥ махталбын тиэрдэбин.
Барыстанан байарым биллибэт эрээри, үлэм социальнай өҥөнү оҥоруу салаата буоларын быһыытынан, тустаах тэрилтэлэртэн өйөбүлү ылыам дии саныыбын. Аны граны уонна кредити ылыыга толкуйданан көрбүт киһи да, хайдах саҕалыырбын билбэппин. Ол барыта сыыйа бэйэтэ ситиһиллэн иһэр ини.

… Ити курдук Александр Степанов дьоҕус бизнес эйгэтигэр бастакы хардыытын оҥорон эрэр. Саҥа суолун тэлэр урбаанньыкка көмө быһыытынан (баҕар, кини курдук ким эмэ бэйэ дьыалатын тэринээччигэ эмиэ) Кэбээйи улууһугар граны уонна субсидияны ылыыга туох үлэ ыытылларын билиһиннэрэбит уонна тустаах тэрилтэ салайааччытын сүбэтин биэрэбит. Маны таһынан  киин уонна хотугу улуустарга бу үлэ эмиэ хайдах ыытылларын холобурдуубут.

Елена ПОТОЦКАЯ.

«Саха сирэ» хаһыат.